Иран побара од САД да го признае поразот и порача дека сообраќајот низ Ормускиот Теснец ќе биде под контрола на Техеран, додека американскиот претседател Доналд Трамп ги предупреди граѓаните да очекуваат повисоки цени на горивата поради војната.
И понатаму нема напредок кон мировни преговори, ниту договор за нормализирање на пловидбата низ стратешкиот Ормуски Теснец, низ кој пред почетокот на конфликтот се пренесуваше околу една петтина од светската нафта.
„Овој теснец ќе биде отворен и затворен само по наредба на Иран. Сè додека не ја прифатите реалноста на поразот и не престанете да живеете во фантазии, Иран ќе продолжи со блокадата“, порача заменик-министерот за надворешни работи на Иран, Казем Гарибабади.
Иранскиот министер за надворешни работи Абас Арагчи изјави дека Техеран сè уште нема донесено одлука за продолжување на разговорите со Вашингтон. Тој порача дека САД мора да исполнат одредени услови за да биде овозможено повторно воспоставување на нормален поморски сообраќај низ Ормускиот Теснец.
Во меѓувреме, Трамп ги повика Американците да прифатат повисоки цени на бензинот додека трае конфликтот со Иран. На политички собир во Њујорк тој изјави дека плаќањето „малку повеќе за бензин“ е цена што вреди да се плати за да се спречи Иран да поседува нуклеарно оружје.
Просечната цена на галон бензин во САД вчера достигнала околу 4,08 долари, што претставува зголемување од 29 отсто во споредба со истиот период минатата година.
Трамп, кој во кампањата вети намалување на трошоците за енергија, сега се соочува со политички притисок поради последиците од конфликтот. Демократите веќе најавуваат дека поскапувањето на горивото ќе биде една од темите на кои ќе инсистираат пред конгресните избори во ноември.
Иран, од своја страна, тврди дека контролата врз Ормускиот Теснец не може да биде воспоставена со изјави или воена сила. „Ормускиот Теснец не може да се освои со твит или со носач на авиони, со издавање наредба или со предизборен говор“, порача Гарибабади.
Последиците од ограничената пловидба веќе се чувствуваат на глобалниот енергетски пазар. Според податоците на компанијата за следење на бродскиот сообраќај „Kpler“, вчера низ Ормускиот Теснец поминале само два брода. Пред војната, низ него дневно минувале околу 130 пловила.
Дополнителна загриженост предизвикуваат и нападите врз бродови. Националната нафтена компанија на Обединетите Арапски Емирати соопшти дека два нејзини брода биле нападнати при минување низ теснецот, додека емиратската државна агенција извести и за уште еден напад.
Прелиминарниот договор за прекин на војната од јуни е во сериозна неизвесност. Арагчи изјави дека Иран не добил примирје кое би можело да биде продолжено, туку дека по претходниот договор за „крај на војната“ настанала нова ситуација.
Дополнителен ризик за проширување на конфликтот претставуваат и нападите на Хутите, кои се поддржани од Иран. Јеменската меѓународно призната влада соопшти дека Хутите истрелале шест балистички ракети кон пристаништето Мока на Црвеното Море, при што загинале четири цивили.
