Иран го обвини НАТО за соучесништво во „незаконската агресија“ на САД и Израел

Иран денеска го обвини НАТО за „соучесништво“ во, како што го нарече, „незаконскиот агресивен војнички поход“ што САД и Израел го воделе против земјата.

Портпаролот на иранското Министерство за надворешни работи, Исмаил Багаи, реагираше на неодамнешните изјави на генералниот секретар на НАТО, Марк Руте, дадени во интервју за Фокс њуз, во кое тој посочи дека стотици американски авиони полетувале од бази во Европа за поддршка на заедничката американско-израелска воена операција „Епски бес“, започната на 28 февруари.

— реклама —

Руте изјави дека околу 500 американски авиони полетале од американските бази во Италија, како и дека аеродромот во Букурешт го намалил комерцијалниот воздушен сообраќај за да овозможи дополнување гориво за воените авиони. Според него, за време на конфликтот од европски бази биле извршени меѓу 4.000 и 5.000 летови на американски воени авиони.

— реклама —

„Ова претставува јасно и осудувачко признание за активното соучесништво на НАТО во незаконската агресија против суверена држава-членка на Обединетите нации“, напиша Багаи на социјалната мрежа Икс.

Тој додаде дека Руте експлицитно ги посочил Италија и Романија како земји кои учествувале во нападите врз Иран.

— реклама —

„Овие земји, заедно со сите останати европски држави што ја поддржаа американско-израелската агресија против Иран, мора да им објаснат на своите граѓани и на светската јавност зошто решија да станат соучесници во овој очигледен чин на агресија и во злосторствата извршени врз иранскиот народ“, изјави Багаи.

— реклама —

Во меѓувреме, Италија ги отфрли тврдењата на Руте дека стотици американски авиони полетувале од италијански бази за поддршка на воените операции против Иран, нагласувајќи дека Рим одобрил само технички и логистички летови.