Иран објави карта на цели: „Напад врз нашата енергетска мрежа ќе го затемни целиот регион“

Иранската државна новинска агенција Мехр објави предупредување за последиците од евентуален напад врз енергетската инфраструктура на земјата, наведувајќи дека таков потег би предизвикал сериозни последици за целиот регион.

— реклама —

Во пораката се истакнува дека и „најмал напад врз електроенергетската инфраструктура на Исламската Република Иран ќе ја турне целата регија во мрак“. На објавената графика на персиски јазик стои пораката „Кажете ѝ збогум на струјата“.

— реклама —

Илустрацијата прикажува карта на Персискиот Залив со означени големи електрани и енергетски постројки во земји како Саудиска Арабија, Катар, Обединетите Арапски Емирати и Бахреин, со дополнителни информации за нивниот тип и капацитет.

Во придружниот текст се наведува дека 70 до 80 проценти од големите електрани во регионот се наоѓаат долж брегот на Персискиот Залив, а значителен дел од нив се оддалечени помалку од 50 километри од морето, што, според тврдењата, ги прави достапни за ирански ракетни удари.

— реклама —

Оваа порака се толкува како директно предупредување за можни последици од понатамошна ескалација на конфликтот, особено во делот на енергетската инфраструктура во регионот.