Иран нема да дозволи нормализирање на пловидбата низ Ормускиот Теснец додека САД не ја променат политиката кон Техеран и не исполнат шест барања, изјави секретарот на иранскиот Врховен совет за национална безбедност, Мохамад Багер Золгадр.
Меѓу условите што ги поставува Техеран се прекин на заканите кон врховниот лидер на Иран, траен прекин на американските воени операции против Иран и неговите регионални сојузници, како и повлекување на американските поморски и воздушни сили кои, според иранските власти, учествуваат во блокадата на земјата.
Иран дополнително бара надомест на штетата предизвикана во неодамнешните судири, укинување на американските санкции и ослободување на замрзнатиот ирански имот.
„Врховниот совет за национална безбедност нема да се откаже од овие барања, ниту во војна ниту во преговори“, изјави Золгадр, тврдејќи дека условите ја одразуваат волјата на иранскиот народ.
Изјавите доаѓаат во период кога преговорите за иднината на пловидбата низ Ормускиот Теснец сè уште немаат конкретен исход. Иран настојува да воспостави поголема контрола врз поморскиот сообраќај, додека САД ги отфрлаат барањата за ограничување на движењето на американските бродови.
САД и Иран на 18 јуни, со посредство на Пакистан и Катар, потпишаа меморандум за разбирање што требаше да ги запре активните судири и да отвори пат за поширок политички договор. Според тогашните услови, Иран требаше повторно да го отвори Ормускиот Теснец, додека САД требаше да ја прекинат поморската блокада.
Сепак, спроведувањето на договорот подоцна заглави, при што двете страни меѓусебно се обвинуваа за негово прекршување.
Ормускиот Теснец е од клучно значење за светските енергетски пазари бидејќи низ него минува голем дел од глобалниот извоз на нафта и природен гас. Поради тоа, секое нарушување на пловидбата низ овој поморски премин може да предизвика сериозни последици врз снабдувањето и цените на енергенсите.
