Иран со порака до Трамп: Преговорите може да продолжат, но притисокот мора да престане

Иранските власти испратија порака дека војната ја променила рамнотежата на силите во Западна Азија, но истовремено оставија отворена можност за продолжување на дипломатијата со САД.

Вршителот на должноста ирански министер за одбрана, Маџид Ибн-е-Реза, оцени дека Техеран ја променил регионалната рамнотежа на силите и дека завршила ерата на воениот притисок. Тој, сепак, порача дека дипломатијата може да продолжи доколку Вашингтон се откаже од притисокот и ги почитува правата на Иран.

— реклама —

Во објава на платформата Икс, Ибн-е-Реза наведе дека Иран „ја променил равенката на регионалната моќ на терен“ и покажал дека завршила ерата на тактиката „удри и бегај“, прекуокеанските воени интервенции и заканите.

— реклама —

Тој додаде дека, според него, медиумските настапи не можат да ја променат реалноста или исходот од конфликтот, а на меѓународната заедница ѝ порача да ја земе предвид повеќемилениумската историја на Иран и кон иранскиот народ да се однесува со почит.

Во меѓувреме, иранскиот министер за надворешни работи, Абас Арагчи, порача дека враќањето на дипломатијата „не е невозможно“, но услов за тоа, според него, е САД да сфатат дека притисокот не дава резултати.

— реклама —

„САД треба да градат доверба, да зборуваат со почит, да ги признаат нашите права и да ги почитуваат преземените обврски“, наведе Арагчи.

Неговите изјави доаѓаат во период кога посредниците повторно се обидуваат да го оживеат дипломатскиот процес меѓу Иран и САД, кој е во застој.

Арагчи во Техеран разговарал и со катарскиот премиер и министер за надворешни работи, шеикот Мухамед бин Абдулрахман Ал Тани. Иранскиот дипломат ја поздравил улогата на регионалните и соседните земји во намалувањето на тензиите и нагласил дека е потребно зајакнување на довербата меѓу државите во регионот.