Иран: Војната ќе трае до целосен пораз на САД и Израел

Иранските вооружени сили порачаа дека војната против САД и Израел ќе продолжи сѐ додека противникот не биде целосно поразен, ставајќи под знак прашање изјавите на американскиот претседател Доналд Трамп дека конфликтот може да заврши во наредните недели.

— реклама —

Во соопштение пренесено од иранската агенција Tasnim, портпаролот на иранската војска предупреди на можна натамошна ескалација. „Војната ќе продолжи до предавање на непријателот и негово трајно каење“, се наведува во изјавата.

— реклама —

Тој додаде дека Иран би можел да изведе „поразорни, пошироки и посилни напади“ врз САД и Израел.

Изјавата доаѓа откако Трамп во обраќање до нацијата повтори дека конфликтот може да заврши за две до три недели, но без конкретен план како би се постигнало тоа. Тој најави продолжување на нападите и се закани дека Иран ќе го „врати во камено доба“, што дополнително ги засили стравувањата од ескалација.

— реклама —

Конфликтот меѓу САД, Израел и Иран трае од крајот на февруари и веќе сериозно го дестабилизира Блискиот Исток, со напади врз воени цели, инфраструктура и трговски бродови.

Особено погоден е Ормускиот теснец, клучна поморска рута за глобалното снабдување со нафта, каде нападите и заканите речиси целосно го запреа сообраќајот, предизвикувајќи раст на цените на енергенсите и дополнителна нестабилност на пазарите.