Иранската војска повторно испрати остра порака дека секоја странска воена сила што ќе се обиде да влезе во Ормутскиот теснец ќе биде нападната.
Шефот на заедничкото командување, Али Абдолахи, изјави дека безбедноста на теснецот е под контрола на Иран и дека движењето на бродовите мора да биде координирано со иранските вооружени сили.
„Повеќепати нагласивме дека безбедноста на Ормутскиот теснец е во наши раце. Секој безбеден премин мора да биде усогласен со нашата војска. Предупредуваме дека секоја странска воена сила, особено агресивната американска војска, ќе биде нападната доколку се обиде да се приближи или да влезе“, се наведува во пораката.
Иранските власти истовремено упатија апел до трговските бродови и танкерите да не се движат низ теснецот без претходна координација, во услови на зголемени тензии во регионот.
