Иранската војска се опоравува побрзо од очекуваното

Иран веќе делумно го обновил производството на дронови за време на шестнеделниот прекин на огнот што започна во април, што покажува дека земјата многу побрзо од очекуваното ги обновува воените капацитети оштетени во американско-израелските напади, објави CNN.

Според извори запознаени со проценките на американските разузнавачки служби, Техеран успеал значително побрзо да ги обнови клучните воени системи, вклучително и производствени капацитети, ракетни позиции и лансери.

— реклама —

Еден американски функционер изјавил дека Иран би можел целосно да ги обнови капацитетите за производство на нападни дронови во рок од шест месеци.

— реклама —

„Иранците ги надминаа сите рокови што ги предвидуваше разузнавачката заедница“, рекол изворот.

Според CNN, во обновувањето на иранските воени способности важна улога имале Русија и Кина. Наводно, Кина продолжила да испорачува компоненти што можат да се користат за производство на ракети, иако официјален Пекинг ги негираше тие тврдења.

— реклама —

Во меѓувреме, американските проценки покажуваат дека околу две третини од иранските ракетни лансери останале функционални и по нападите, додека околу половина од дроновите на Иран сè уште постојат.

Извештајот наведува и дека Иран задржал дел од крајбрежните крстосувачки ракети, важни за евентуални операции во Ормускиот теснец.

Овие проценки се разликуваат од изјавите на командантот на CENTCOM, адмиралот Бред Купер, кој неодамна тврдеше дека американско-израелската операција уништила 90 проценти од иранската воена индустриска база и дека на Техеран ќе му бидат потребни години за закрепнување.