Пратеникот на Левица, Реџеп Исмаил, на собраниска седница за пратенички прашања упати прашање до министерот за надворешни работи и надворешна трговија, Тимчо Муцунски, кој не се појави на седница каде треба да даде отчетност. Исмаил побара одговор дали Министерството има конкретна политика за намалување на мотивите поради кои македонските граѓани масовно аплицираат за бугарско државјанство.
Во своето обраќање, Исмаил се осврна на извештајот за работата на Министерството за надворешни работи и надворешна трговија, кој бил доставен до собраниската Комисија за надворешни работи како неформално резиме, без јасна методологија, структура и потпис. Тој потсети дека министерот Муцунски во своето експозе работата на Министерството ја сумирал со трите зборови „достоинство, резултати и визија“, оценувајќи дека реалната состојба го покажува спротивното.
Во делот за „резултатите“, Исмаил посочи дека положбата на Македонците во соседните држави останува непроменета или влошена. Според него, во Албанија продолжува бугаризацијата на дел од македонското население и иселувањето од традиционалните македонски средини, додека конзулатот во Корча сè уште не е функционален, а македонската дипломатија не покажува доволна активност во заштитата на интересите на македонската заедница.
Осврнувајќи се на Бугарија, Исмаил истакна дека и покрај пресудите на Европскиот суд за човекови права и предупредувањата од меѓународни организации, македонските здруженија и понатаму се соочуваат со непризнавање и институционални притисоци.
„Министерството за надворешни работи не само што нема подобри резултати, туку нема никаква иницијатива било како да ги подобри овие работи на македонското малцинство во Бугарија“, нагласи Исмаил.
Тој посочи и дека состојбата на Македонците во Грција останува непроменета, при што и понатаму не се признава постоењето на етничко македонско малцинство и неговите основни права на здружување и културно изразување.
Во продолжение, пратеникот го отвори прашањето за масовното земање бугарски пасоши од страна на македонските граѓани. Според официјалните бугарски податоци што ги цитираше, од 2007 година до средината на 2025 година бугарско државјанство добиле над 200.000 македонски државјани, додека десетици илјади барања сè уште се во процедура.
„Овој тренд отвора сериозни прашања. Вие не само што покажавте дека немате никаква стратегија за запирање на овој процес, туку не покажавте ниту иницијатива за негово намалување“, истакна Исмаил.
Тој праша дали Министерството презело конкретни дипломатски активности за олеснување на пристапот на македонските граѓани до европскиот пазар на труд, без потреба од стекнување бугарско државјанство.
„Дали направивте некаков обид за билатерален договор, на пример со Германија, за нашите граѓани да не мора да посегнуваат по бугарски пасоши за да работат во Европската Унија?“, праша Исмаил.
Според пратеникот на Левица, прашањето за масовното стекнување бугарски државјанства претставува едно од најважните прашања за македонските национални интереси и бара активна и јасна стратегија од македонската дипломатија, наместо декларативни оценки за „достоинство, резултати и визија“.
