Исмаил по труењето на над 1.000 гостиварци: Време е да се признае колку државата назадува од Југославија наваму

Пратеникот на Левица, Реџеп Исмаил, реагираше по случајот во Гостивар, каде што повеќе од 1.000 граѓани побараа лекарска помош поради сомнеж за неисправна вода за пиење, оценувајќи дека настанот е показател за, како што вели, долгогодишното назадување на државата.

— реклама —

Во објава на социјалните мрежи, Исмаил направи споредба меѓу состојбата во поранешна Југославија и денешната состојба во Македонија, тврдејќи дека во минатото не се случувале случаи на масовно труење со вода од градските водоводи.

— реклама —

— реклама —

Тој посочи и на, како што наведува, влошената состојба со животната средина, јавната инфраструктура и урбанизмот во повеќе градови, меѓу кои Гостивар, Тетово, Дебар и Струга, обвинувајќи дека загадувањето, дивите депонии, неконтролираната урбанизација и запоставувањето на културното наследство се резултат на долгогодишно институционално потфрлање.

Исмаил во објавата се осврна и на состојбата во скопската Стара чаршија, населбата Чаир и неколку културно-историски споменици, оценувајќи дека нивната автентичност е нарушена. Тој постави и прашања во врска со промената на имињата на улици и јавни обележја, оценувајќи дека тоа претставува искривување на историското наследство.

— реклама —

„Време е да се признае колку државата назадува од Југославија наваму“, порача Исмаил во својата објава.