Турскиот претседател Реџеп Таип Ердоган изјави дека Анкара има намера што е можно поскоро да потпише сеопфатен договор за енергетска соработка со Ирак.
На заедничката прес-конференција по средбата со ирачкиот премиер Али ал-Заиди во Анкара, Ердоган рече дека двете земји имаат заедничка цел да постигнат нов енергетски договор, кој ќе биде од взаемна корист, откако во понеделникот истече важечкиот договор за нафтоводот Киркук–Џејхан.
„Договорот за нафтоводот меѓу Ирак и Турција истече вчера. Нашата цел е што побрзо да потпишеме сеопфатен енергетски договор што ќе им користи на двете страни“, изјави Ердоган.
Иако се очекуваше за време на посетата да биде потпишан договор за продолжување на спогодбата што го регулира извозот на ирачка нафта преку овој нафтовод, до потпишување не дојде.
Во меѓувреме, турската државна нафтена компанија TPAO стекна 15-процентен удел во компанијата BP Energy Company of Kirkuk Ltd (BPECKL), со што ќе учествува во експлоатацијата на нафтеното поле Киркук, кое го управува конзорциум предводен од британската компанија BP.
Турскиот министер за енергетика Алпарслан Бајрактар изјави дека TPAO ќе соработува со партнерите на BPECKL во развојот на наоѓалиштето, за кое се проценува дека располага со околу три милијарди барели резерви на нафта.
Од BP го потврдија договорот и го поздравија партнерството со турската државна компанија.
Нафтоводот Киркук–Џејхан го поврзува северен Ирак со турското медитеранско пристаниште Џејхан и претставува една од најважните рути за извоз на ирачка нафта.
