Историски пресврт во Кина: Соларната енергија за првпат го надмина јагленот

Кина направи историски чекор во енергетскиот сектор, откако инсталираниот капацитет на соларни електрани за првпат го надмина капацитетот на електраните на јаглен.

— реклама —

До крајот на јули, вкупниот соларен капацитет во земјата достигнал 1.286 гигавати, додека капацитетот на термоелектраните на јаглен изнесувал 1.285 гигавати.

Од соларниот капацитет, 704 гигавати се однесуваат на големи, централизирани соларни електрани, а 582 гигавати на дистрибуирани системи. Соларната енергија сега сочинува 31,5 отсто од вкупниот инсталиран капацитет за производство на електрична енергија во Кина.

— реклама —

Само во јули Кина додала нови 13,73 гигавати соларен капацитет, што е за 43 отсто повеќе од истиот месец минатата година.

— реклама —

Од јануари до крајот на јули, соларниот капацитет е зголемен за 85,65 гигавати. Иако тоа е за 62 отсто помалку во споредба со истиот период во 2025 година, минатогодишниот резултат бил исклучително висок поради забрзаното поставување нови капацитети во првите пет месеци.

Производството на електрична енергија од сончеви извори во првите седум месеци годинава достигнало 802,4 милијарди киловат-часови, што е раст од 15,5 отсто на годишно ниво.

Во исто време, соларната енергија веќе учествува со 13 отсто во вкупната потрошувачка на електрична енергија во Кина, што е за 1,7 процентни поени повеќе од уделот забележан во текот на целата мината година.