Кина ја засилува употребата на арктичкиот коридор: Испораките до Европа се скратуваат до 25 дена

Арктичката поморска рута станува сè попривлечна за кинеските компании што испорачуваат стока во Европа, бидејќи овозможува пократко време на транспорт и претставува алтернатива на традиционалните бродски коридори изложени на геополитички ризици.

— реклама —

Според анализи објавени во кинескиот весник „Глобал тајмс“, особено голем интерес постои за транспорт на стоки чувствителни на високи температури, како батерии, соларна опрема, системи за складирање енергија и електронски производи.

Компанијата „Њу Њу Шипинг Лајн“ наведува дека патувањето од Шангај до Санкт Петербург преку Суецкиот канал обично трае од 38 до 45 дена, додека со арктичката рута времето се скратува на 23 до 25 дена. Пократкото патување значи и пониски оперативни трошоци.

— реклама —

Интересот за оваа рута дополнително расте поради неизвесностите во традиционалните поморски коридори, особено во Црвеното Море и на Блискиот Исток. Кинеските логистички компании бележат зголемена побарувачка, а дел од нив се соочуваат и со тешкотии при резервирањето товарен простор, особено пред европската сезона на празнично купување.

— реклама —

Шангајската компанија „Си Легенд Шипинг“ во август и септември организирала осум патувања по арктичката рута, во обид да воспостави редовен неделен превоз на стока.

Сепак, главна пречка за поширока употреба на овој коридор остануваат сезонските ограничувања. Вообичаената пловидбена сезона трае од средината на јули до средината или крајот на октомври, по што мразот ја отежнува пловидбата и сообраќајот се прекинува до следното лето.

Компаниите работат на подобрување на бродовите за пловидба во замрзнати води и на продолжување на сезоната. Аналитичарите сметаат дека со развојот на навигациските технологии и инфраструктурата, арктичката рута би можела да добие уште поголемо значење во светската трговија и да ги надополнува железничките врски меѓу Кина и Европа.