Основното јавно обвинителство за гонење на организиран криминал и корупција отвори истрага против шест физички и две правни лица поради сомнение за проневера во службата и перење пари поврзани со наплата на надоместоци при регистрација на возила.
Истрагата е поведена по кривична пријава од Одделот за сузбивање на организиран и сериозен криминал. Според Обвинителството, првоосомничен е сопственик и управител на правно лице од Кучевиште, кој истовремено бил неизвршен член на Одборот на директори во осигурително брокерско друштво. Тој се сомничи за „Проневера во службата“ и „Перење пари и други приноси од казниво дело“.
За помагање при извршувањето на делата се осомничени двајца извршни членови на Одборот на директори во осигурителното брокерско друштво, овластен сметководител и управител на друштво за книговодствени услуги и консалтинг, како и раководител на станица за технички преглед и помошник-директорката за финансии во Јавното претпријатие за државни патишта. Во истрагата се опфатени и две правни лица осомничени за перење пари.
Според досега обезбедените докази, во периодот од 1 јануари 2021 до 20 јануари 2026 година, првоосомничениот со намера да се стекне со противправна имотна корист присвоил 138.877.419 денари, односно околу 2,26 милиони евра.
Како управител на правното лице кое вршело технички преглед на возила, тој наводно изготвувал и доставувал лажни извештаи за наплатени надоместоци при регистрација на возила до надлежни институции и општини, како и невистинити уплатници за надоместоци за јавни патишта.
Раководителот на станицата за технички преглед, според Обвинителството, изготвувал и потпишувал фактури и доставувал извештаи со невистинити податоци за наплатените средства.
За прикривање на потеклото на парите, дел од наплатените надоместоци биле уплаќани на сметки на осигурително брокерско друштво. Осомничените членови на Одборот на директори, според истрагата, знаеле или требало да знаат дека средствата не потекнуваат од осигурителната дејност. Парите биле префрлани меѓу сметките на правните лица и мешани со приходите од редовното работење, а дел бил искористен и за купување недвижности.
Осомничениот сметководител, според Обвинителството, внесувал невистинити податоци во сметководствената документација и поднесувал даночни пријави и годишни сметки кои не ја прикажувале реалната финансиска состојба на правното лице.
Во истрагата е опфатена и помошник-директорката за финансии во ЈПДП, за која постои сомнение дека, иако била должна да ја следи наплатата на надоместоците и да ги проверува извештаите, свесно не ги презела потребните дејствија. Дополнително, според Обвинителството, таа го известувала раководителот на станицата за технички преглед за износите наплатени на сметката на ЈПДП, наместо правното лице да доставува месечни извештаи до претпријатието.
Со дејствијата опфатени во истрагата, според ОЈО ГОКК, била прибавена противправна имотна корист од 138.877.419 денари на штета на повеќе институции и општини.
За обезбедување на присуството на осомничените во текот на постапката, јавниот обвинител до судијата на претходна постапка при Основниот кривичен суд Скопје доставил предлог за определување притвор за тројца осомничени, како и мерки на претпазливост за еден осомничен.
