ОЈО бара притвор за двете финансиски раководителки во Државна лотарија, осомничени дека присвоиле речиси 80 милиони денари

Основното јавно обвинителство Скопје отвори истрага против две финансиски раководителки во Државна лотарија, осомничени дека во текот на 2024 година присвоиле речиси 80 милиони денари. За двете е побарано определување мерка притвор.

Станува збор за директорката на Секторот за финансии и сметководство и шефицата за финансиски работи во АД Државна лотарија, за кои постои основано сомнение дека како соизвршителки сториле кривично дело „проневера во службата“.

— реклама —

Според Обвинителството, во текот на цела 2024 година тие, користејќи ги своите овластувања и должности, заеднички преземале дејствија со намера да прибават противправна имотна корист.

Истрагата се однесува на вкупно 79.989.444 денари, за кои постои сомнение дека биле присвоени од двете осомничени.

— реклама —

Како овластени лица за подигнување готовински средства наменети за исплата на мали добивки и лица задолжени за прием и уплата на дневниот промет од сопствените продажни места на друштвото, тие, според Обвинителството, дневниот промет што им бил доверен во текот на 2024 година не го уплаќале и не го депонирале на трансакциските сметки на Државна лотарија во деловните банки, туку го присвојувале.

— реклама —

Дополнително, се сомничат дека подигнувале парични средства од банкарските сметки на Државна лотарија, кои исто така ги присвојувале.

Јавниот обвинител до судија на претходна постапка од Основниот кривичен суд Скопје доставил предлог за определување мерка притвор за двете осомничени.

— реклама —

Како причини за барањето се наведуваат опасноста од криење и бегство, како и основан страв дека осомничените би можеле да се обидат да ги сокријат, фалсификуваат или уништат трагите од кривичното дело.

Обвинителството наведува и можност за попречување на постапката преку влијание врз сведоци, вештаци, соучесници или прикривачи, како и околности што упатуваат на можност за повторување на кривичното дело.