Италија планира казни до 160 евра за возачите што возат премногу бавно

Возачите во Италија наскоро би можеле да се соочат со парични казни до 160 евра доколку на одредени делници од автопатите возат премногу бавно. Предложената мерка има цел да ја подобри проточноста на сообраќајот и првично би се применувала на автопатите со шест сообраќајни ленти.

— реклама —

Според најавите, на делниците со најмалку три ленти во секоја насока би била пропишана минимална брзина од 100 километри на час во левата лента.

— реклама —

Сепак, ќе има исклучоци кога сообраќајните знаци наложуваат поинаква брзина или кога условите на патот бараат побавно возење. Тоа се однесува на густа магла, силен дожд, сообраќајни несреќи, градежни работи и застои во сообраќајот.

— реклама —

Казните би се движеле од 40 до 160 евра, а се предвидени во нацрт-законот за безбедност во сообраќајот, кој италијанската влада го одобри во октомври и го испрати во парламентот. Се очекува мерката да стапи во сила по усвојувањето на конечниот законски текст.

— реклама —

Италијанските автопати секоја година ги користат милиони туристи. Според податоците на италијанската Агенција за заштита на животната средина ИСПРА, пред две години околу 40,7 милиони странски посетители пристигнале во земјата со автомобил, што претставува речиси 46 отсто од вкупниот број меѓународни пристигнувања.