Италијанец загина од удар на гром додека ловел риба на јадранскиот брег

Риболовот на јадранскиот брег во Италија трагично завршил за 70-годишен маж, кој загинал откако гром удрил во врвот на риболовниот стап што го држел во рацете.

— реклама —

Несреќата се случила во петокот, 18 септември, на карпите во близина на плажата во местото Санта Лучија, недалеку од Остуни, во областа Бриндизи. Мажот бил со пријател, кој останал неповреден, но доживеал силен шок.

— реклама —

По ударот на громот, пријателот веднаш повикал итна медицинска помош. Екипите пристигнале на местото и се обиделе да го реанимираат 70-годишниот маж, но не успеале да го спасат.

Според првичните наоди од истрагата, громот го погодил врвот на карбонскиот риболовен стап. Од силниот удар мажот паднал врз карпите и се здобил со повреди на главата, објави агенцијата АНСА.

— реклама —

Во попладневните часови областа кај Остуни била зафатена од силно невреме со чести удари на гром, додека во јужните делови имало краткотрајна бура.

Ова е втор смртен случај на истото подрачје во период од околу една година. На 2 октомври минатата година, за време на невреме, животот го загубил уште еден Италијанец, Оронко Епифани, чие возило било повлечено од надојдена вода во канал. Неговото тело било пронајдено неколку часа подоцна на непристапен терен во близина на карпестиот брег.