СДСМ преку соопштение обвини дека премиерот Христијан Мицкоски повторно ја отвора темата за предвремени парламентарни избори, оценувајќи дека неговите последни изјави покажуваат оти власта сама го подготвува теренот за изборно сценарио.
Од опозициската партија велат дека Мицкоски најпрво тврдел оти граѓаните не сакаат предвремени избори, а потоа најавил дека би прифатил избори доколку опозицијата го побара тоа.
„Тоа не е став. Тоа е монтажа. Самиот си ја пишува понудата. Самиот си ја чека нарачката“, наведуваат од СДСМ.
Од партијата прават и споредба со Србија, посочувајќи дека веднаш по најавите на Александар Вучиќ за избори, темата повторно била актуелизирана и во Македонија.
СДСМ обвинува и за, како што велат, засилено медиумско влијание од Србија, кое според нив има цел да создаде „целосен медиумски мрак“ и да го насочи вниманието на јавноста кон политички пресметки наместо кон проблемите со кои се соочуваат граѓаните.
Од опозицијата посочуваат дека власта располага со значително мнозинство во институциите и дека за распишување избори не ѝ е потребна согласност од СДСМ.
„Не му треба ни наша согласност, ни туѓа храброст. Му треба алиби“, велат од СДСМ, според кои изборите би можеле да бидат искористени како начин за пренасочување на одговорноста за економските и политичките проблеми.
Партијата тврди дека нема да му го обезбеди тоа алиби на Мицкоски и дека доколку сака предвремени избори, треба самиот да ги закаже и да излезе пред граѓаните со резултатите од своето работење.
Од СДСМ воедно ги посочуваат прашањата за кои сметаат дека власта ќе треба да даде одговор пред граѓаните, меѓу кои состојбата со водоснабдувањето во Гостивар, случаите со починати лица во Скопје, наводите за загадена вода и економската состојба.
„Ако сака избори, нека ги закаже. Самиот. Со свој потпис. И нека излезе пред граѓаните со празниот буџет, со водата во Гостивар, со починатите во Скопје, со 5.000 отруени, со пиперката од 40 денари и со фрижидерот и паричникот што се празни“, наведуваат од СДСМ.
Од партијата обвинуваат и дека во евентуална предизборна кампања власта би можела повторно да ја отвори темата на меѓуетничките односи и национализмот, со цел да се пренасочи вниманието од резултатите на владеењето.
„Ние нема да му бидеме алиби. Граѓаните ќе бидат сведоци“, порача СДСМ, додавајќи дека е подготвен за избори „кога и да бидат“, но дека нема да служи како изговор за нивното распишување.
