Премиерот Христијан Мицкоски на денешната прес-конференција изјави дека Изборниот законик е дел од реформите поврзани со европската интеграција на државата, посочувајќи дека тоа јавно го потврдила и еврокомесарката за проширување Марта Кос.
Одговарајќи на новинарско прашање за обвинувањата од СДСМ дека Владата ја доведува јавноста во заблуда кога тврди дека Изборниот законик е европски услов, Мицкоски рече дека изјавата на еврокомесарката е доволен доказ.
„Сите можеа да ја слушнат комесарката Марта Кос како кажа дека тоа е дел од реформите кои се важни за евроинтеграцијата. Не мора мене да ме слушаат, нека ја слушаат неа“, изјави премиерот.
Тој ја обвини опозицијата за недоследност во однос на европските интеграции, оценувајќи дека СДСМ се повикува на Европа само кога тоа е во нејзин политички интерес.
„Кога станува збор за нивен интерес, полна им е устата со Европа. Но кога треба да се преземат конкретни чекори и да се понесе одговорност, прават сè за државата да не стигне таму каде што треба“, рече Мицкоски.
Премиерот порача дека Владата ќе продолжи со реализацијата на реформите и стратешките цели, нагласувајќи дека полноправното членство во Европската Унија останува приоритет, без оглед на ставовите на опозицијата.
