„Изет Меџити го уништува спортот: Вчера ФК Шкупи, денес КК Чаир“, велат од ДУИ

ДУИ преку соопштение обвинува дека спортот во Општина Чаир се соочува со сериозен пад откако со општината раководи Изет Меџити, посочувајќи ги како примери ФК Шкупи и КК Чаир.

Од партијата потсетуваат дека ФК Шкупи пред неколку години беше шампион на Северна Македонија и настапуваше во европските натпреварувања, но минатата сезона заврши на последното место и испадна од Првата лига.

— реклама —

Сега, според ДУИ, слична ситуација се случува и со КК Чаир. Кошаркарската федерација соопштила дека клубот не ги исполнил финансиските обврски за лиценцирање и нема да настапува во Суперлигата во сезоната 2026/2027.

— реклама —

ДУИ посочува дека Општина Чаир само во 2026 година му доделила на клубот 3,6 милиони денари јавни средства, а клубот имал и други извори на јавно финансирање.

Од партијата бараат одговори за тоа колку средства вкупно добил КК Чаир од Општината и другите институции, за што биле потрошени 3,6 милиони денари и колкав бил неплатениот долг кон Кошаркарската федерација.

— реклама —

Од ДУИ прашуваат и како било можно клубот да добива јавни средства, а да не ги подмири обврските неопходни за добивање лиценца.

„ФК Шкупи – од шампион, надвор од Првата лига. КК Чаир – од Суперлигата, без лиценца“, наведуваат од ДУИ, оценувајќи дека станува збор за сериозен проблем со управувањето и одговорноста во спортот во Чаир.

Партијата бара од Изет Меџити да објасни што се случува со спортот во општината и како се користат јавните средства наменети за спортот.