Пожарот што вчера попладне избувна над Штип е целосно изгаснат благодарение на брзата интервенција на пожарникарите и доброволците, соопштија од Центарот за управување со кризи.
Во гаснењето на огнената стихија учествувале екипи на Територијалната противпожарна единица Штип со 20 пожарникари и четири противпожарни возила, Доброволното противпожарно друштво Штип со 10 лица и четири возила, како и пожарникари од Кочани со две возила и шестмина припадници, додека поддршка пристигнала и од Свети Николе.
Пожарот избувнал откако гром запалил сува трева и грмушки, а поради силниот ветер пламените јазици брзо се прошириле кон ридовите Клисебаир и Кумлак. Во еден момент огнот се доближил и до првите куќи во населбата Кадидаре, предизвикувајќи вознемиреност кај жителите.
Градоначалникот на Штип, Иван Јорданов, на вонредна прес-конференција изјави дека пожарот се ширел на непристапен терен, поради што интервенцијата била дополнително отежната.
„Екипите на ТППЕ, заедно со членовите на Доброволното противпожарно друштво, веднаш излегоа на терен со целокупната логистика и ресурси за локализација на пожарот, кој поради непристапноста се ширеше“, истакна Јорданов.
Тој нагласи дека немало простор за паника, бидејќи сите надлежни институции биле целосно мобилизирани. Во пожарот нема повредени лица, а станбените објекти не биле загрозени.
Благодарение на координираната акција и навремената реакција, огнената стихија е ставена под контрола и целосно изгасната.
