Израелскиот амбасадор во Обединетите нации, Дани Данон, побара укинување на меѓународниот налог за апсење на премиерот Бенјамин Нетанјаху, откако главниот обвинител на Меѓународниот кривичен суд (МКС), Карим Кан, беше суспендиран од функцијата.
Во објава на социјалната мрежа Икс, Данон оцени дека суспензијата на Кан претставува доказ дека „оваа институција е расипана до срж“.
„Сега е време да се поништат апсурдните обвиненија против премиерот Нетанјаху“, напиша израелскиот дипломат.
Карим Кан беше суспендиран поради сомнежи за сексуално недолично однесување кон колешка. Британскиот обвинител ги негира сите обвинувања и најави дека има намера да се врати на должноста откако случајот ќе биде расчистен.
Кан, кој е главен обвинител на МКС од 2021 година, во 2024 година издаде налог за апсење на израелскиот премиер Бенјамин Нетанјаху, обвинувајќи го за воени злосторства и злосторства против човештвото поврзани со војната во Појасот Газа.
Поради воените дејствија во Газа, во кои, според различни извори, загинаа десетици илјади луѓе, Израел се соочува со обвинувања за воени злосторства, а во одредени случаи и за геноцид. Израелската влада категорично ги отфрла овие наводи и тврди дека станува збор за дел од поширок конфликт со Иран и неговите регионални сојузници.
Поради налогот за апсење на Нетанјаху, САД дополнително го зголемија притисокот врз МКС и воведоа санкции против поединечни службеници и судии на Судот.
Во меѓувреме, произраелскиот адвокат Арсен Островски оцени дека суспензијата на Кан отвора сериозни прашања за интегритетот на неговиот мандат и побара обвиненијата против Израел веднаш да бидат отфрлени.
Меѓународниот кривичен суд е основан врз основа на Римскиот статут, кој го имаат ратификувано 125 држави, меѓу кои и сите членки на Европската Унија. Сепак, САД, Русија и Израел не се членки на Судот.
