Во близина на хотелот во Њујорк каде што, според медиумските наводи, требало да престојува израелскиот премиер Бенјамин Нетанјаху за време на заседанието на Генералното собрание на ОН, полицијата уапси двајца мажи кои биле забележани како излегуваат од градскиот канализациски систем.
Полицијата во Њујорк (NYPD) ги уапсила 26-годишниот Кевин Родригез и 25-годишниот Самјуел Реверон, под сомнение дека сториле кривични дела поврзани со здружување и неовластено влегување на туѓ имот, пренесува Би-Би-Си.
Од полицијата за Би-Би-Си било соопштено дека во последните месеци биле регистрирани повеќе случаи на лица кои влегувале во канализацискиот систем во потрага по вредни предмети и старо железо по невремиња.
„Овој инцидент одговара на истиот образец, но од претпазливост, имајќи го предвид заседанието на Генералното собрание на ОН и чувствителноста на локацијата, NYPD спроведува дополнителни безбедносни проверки со федералните партнери“, соопшти полицијата.
Според полицијата, двајцата мажи побегнале од местото откако излегле од шахтата, по што околу 4:30 часот по локално време бил повикан полициски патрол.
На сослушувањето двајцата се изјасниле дека не се виновни и биле пуштени на слобода, покажуваат судските податоци.
Случајот се случува по серија слични инциденти во различни делови на Њујорк, каде што лица биле забележувани како излегуваат од шахти. Во август, надзорна камера снимила лице како рано наутро излегува од шахта во Квинс, додека истиот месец полицијата истражувала и случај со три лица во работни комбинезони и со челни ламби, забележани во близина на станицата Пен.
Во мај, група лица била снимена како го поместува капакот на шахта и се спушта во канализацискиот систем во јужен Бруклин.
Градските власти предупредуваат дека влегувањето во канализацискиот систем на Њујорк е незаконско и опасно поради можноста за изложеност на отровни гасови и ненадејни поплави во затворените простори.
