Израелскиот премиер Бенјамин Нетанјаху тајно отпатувал во Абу Даби, каде што, според израелските медиуми, се сретнал со претседателот на Обединетите Арапски Емирати, шеикот Мухамед бин Зајед Ал Нахјан.
Израелскиот Канал 12 објави дека Нетанјаху отпатувал со приватен авион до главниот град на ОАЕ и таму поминал дел од денот со шеикот Мухамед. Посетата претходно не била најавена од кабинетот на израелскиот премиер.
Според јавниот сервис Кан, патувањето се случило во период кога во јавноста се води полемика околу медиумските објави за разузнавачки предупредувања кои наводно Нетанјаху ги добил пред нападот на Хамас врз Израел на 7 октомври 2023 година.
„Њујорк тајмс“ во петокот објави дека Нетанјаху пред нападот на Хамас добил доверливо предупредување од претседателот на ОАЕ, но не го проследил до раководителите на израелските безбедносни служби.
Според Кан, Нетанјаху патувал со приватен авион во сопственост на неименуван израелски бизнисмен, кој го користат високи израелски функционери при патувања во странство.
Авионот попладнето полетал од аеродромот „Бен Гурион“ и во 15:10 часот по локално време слетал во Абу Даби. Четири часа подоцна, во 19:10 часот, тргнал назад кон Израел и слетал нешто по 22 часот.
Кан наведува и дека истиот авион Нетанјаху го користел и при претходното патување во Абу Даби за време на војната со Иран.
Од друга страна, весникот „Нешна“, со седиште во Абу Даби, цитирал неименуван извор од ОАЕ, според кого земјата за безбедносните прашања со други држави разговара преку надлежните институции, а не директно на ниво на државни лидери.
Нетанјаху ја предводи актуелната израелска влада од крајот на 2022 година. Меѓународниот кривичен суд во 2024 година издаде налози за негово апсење, како и за апсење на поранешниот израелски министер за одбрана Јоав Галант, поради наводни воени злосторства во Газа.
Според податоците наведени во изворот, од почетокот на израелската воена операција во Газа на 8 октомври 2023 година, загинале повеќе од 74.000 Палестинци, а над 175.000 биле повредени. Во конфликтот е оштетен и голем дел од инфраструктурата на територијата.
