Израел го блокираше Хеброн, десетици Палестинци принудени да ги напуштат домовите

Израелската војска денеска ги затвори приодите кон градот Хеброн, на окупираниот Западен Брег, и принуди десетици Палестинци да ги напуштат своите домови, по вооружени напади во кои, според израелските власти, загинале двајца војници.

На влезовите во градот, кои се под контрола на израелските сили, се создале колони од такси-возила што чекаат патници. Палестинците се принудени пеш да ги минуваат контролните пунктови, бидејќи пристапот со автомобили е блокиран.

— реклама —

Според информации објавени на локални канали на Телеграм, сите влезови и излези од Хеброн се затворени за автомобилски сообраќај.

— реклама —

Палестинската новинска агенција ВАФА објави дека израелските сили принудиле десетици жители да ги напуштат своите домови, додека во градот се спроведуваат воени операции и претреси.

Израелската војска вчера соопшти дека започнала „прецизни, насочени и темелни претреси“ во областа Хеброн, како одговор на нападите во кои, според нејзините информации, биле убиени двајца војници, а други биле ранети.

— реклама —

Според израелската војска, двајцата вооружени напаѓачи дејствувале од подрачјето на Хеброн, поради што безбедносните операции се насочени кон оваа област.

Затворањето на патиштата и контролните пунктови дополнително го отежнува секојдневниот живот на Палестинците на Западниот Брег. Ваквите ограничувања, кои стануваат сè почести, ги спречуваат жителите да стигнат до работните места, училиштата и соседните населени места.

Засега нема информации колку долго ќе трае блокадата на Хеброн, ниту кога раселените жители ќе можат да се вратат во своите домови.