Израел: Го укинуваме договорот со Палестинците, контролата се враќа кај нас

Израелскиот министер за финансии Безалел Смотрич соопшти дека го поништи Хебронскиот договор од 1997 година, со што дел од овластувањата во поделениот град Хеброн на Западниот Брег повторно ќе преминат под целосна одговорност на израелската држава.

— реклама —

Смотрич, кој важи за еден од најтврдокорните десничари во израелската влада, ја нарече одлуката „историска исправка“ и порача дека продолжува со „продлабочување на израелскиот суверенитет“ на Западниот Брег.

— реклама —

Според неговата објава, палестинската општинска власт во Хеброн повеќе нема да има надлежности над одредени делови од градот и светите места, меѓу кои и Гробницата на патријарсите, позната и како Авраамово светилиште.

Палестинскиот претседател Махмуд Абас предупреди дека станува збор за многу опасен потег и ја повика меѓународната заедница итно да интервенира, оценувајќи дека одлуката ги поткопува напорите за решение со две држави.

— реклама —

Критики стигнаа и од израелската организација „Peace Now“, која одлуката ја оцени како „опасен и неодговорен чекор“ што може дополнително да ги разгори тензиите на окупираниот Западен Брег.

Хебронскиот договор беше постигнат во 1997 година за време на претходниот мандат на Бенјамин Нетанјаху како премиер и предвидуваше поделба на градот меѓу израелската и палестинската администрација.