Израел донесе одлука да ја прекине целокупната набавка на воена опрема од Франција, како дел од поширока стратегија за намалување на соработката со земји што преземаат политички и дипломатски чекори против израелските политики.
Одлуката ја потврди генералниот директор на израелското Министерство за одбрана, Амир Барам, кој изјави дека државата ќе се ориентира кон домашната одбранбена индустрија и кон партнери од, како што ги нарече, „пријателски земји“.
Сепак, практичниот ефект од оваа мерка се очекува да биде ограничен. Според француските власти, воената размена меѓу двете земји и досега била релативно мала и во опаѓање. Во 2024 година Франција одобрила над 200 извозни дозволи за стоки со двојна намена кон Израел, во вредност од 76,5 милиони евра – што е значително помалку во однос на претходната година.
Постојните договори ќе продолжат да се реализираат, а не е исклучено и приватни компании да продолжат со одредени бизнис-зделки.
Односите меѓу двете земји значително се влошија по почетокот на војната во Газа, при што Париз зазеде сè покритичен став кон израелските воени операции. Франција во меѓувреме ја призна палестинската државност, повика на прекин на огнот и воведе ограничувања за израелски компании, вклучително и забрана за учество на саеми за вооружување.
Овој потег на Израел се толкува како дополнително заострување на односите со европските партнери во услови на поширока геополитичка поларизација поврзана со конфликтот на Блискиот Исток.
