Израел оваа недела им доставил на Соединетите Американски Држави разузнавачки информации за нов и, како што се наведува, конкретен план на Иран за атентат врз американскиот претседател Доналд Трамп, објавија повеќе американски медиуми, повикувајќи се на неименувани извори.
Според Си-Ен-Ен, американските служби веќе подолг период следеле информации за можни закани кон Трамп, но предупредувањето од Израел се однесувало на нов и конкретен заговор. И „Волстрит џурнал“, повикувајќи се на свои извори, објави дека станува збор за новоразвиен план.
Објавите доаѓаат во време кога повторно се зголемени тензиите меѓу САД и Иран, по новите воени напади, што ги засили стравувањата од натамошна ескалација на конфликтот.
Според медиумските извештаи, токму поради безбедносни причини, Трамп, при заминувањето од самитот на НАТО во Анкара, не го користел новиот претседателски авион, туку постариот „Ер Форс Уан“. Новиот авион, кој Катар му го подари на САД, бил испратен однапред во Велика Британија, каде што претседателот подоцна се префрлил во него.
„Њујорк тајмс“ објави дека промената на авионот била направена по барање на Тајната служба на САД како дополнителна безбедносна мерка.
Од Белата куќа не ги коментираа директно информациите, туку упатија на неодамнешната изјава на Трамп.
„Тие сакаат да го елиминираат лидерот на САД – мене. На нивната листа сум. Утрово видов дека сум на сите нивни листи“, изјави Трамп пред новинарите во авионот на враќање од самитот.
Иран со години најавува одмазда против Трамп поради наредбата за ликвидација на иранскиот генерал Касем Сулејмани, извршена во јануари 2020 година за време на неговиот прв претседателски мандат. Иранските власти засега не ги коментираа најновите медиумски наводи.
