Израел: Подготвени сме за уште посилен удар врз Иран

Началникот на Генералштабот на израелската армија, Ејал Замир, изјави дека Израел е подготвен да изведе нов, длабок напад врз Иран веднаш штом добие наредба за тоа.

— реклама —

Според соопштението објавено на официјалната интернет-страница на израелската војска, Замир оценил дека неодамнешниот напад врз Иран бил само „подготовка за многу позначаен и потежок удар“.

„Подготвени сме да дејствуваме повторно и да му нанесеме на Иран уште посилен удар кога ќе добиеме наредба“, порачал тој.

— реклама —

Во меѓувреме, дополнително се зголемуваат тензиите меѓу САД и Иран, откако американскиот претседател Доналд Трамп го обвини Техеран дека стои зад падот на американскиот воен хеликоптер „AH-64 Apache“, кој патролирал над Ормускиот Теснец.

— реклама —

„Нашата голема војска ме извести дека Иранците синоќа собориле еден од нашите многу софистицирани хеликоптери „Апачи“ додека патролирал над Ормускиот Теснец. Во него имало двајца пилоти, кои се безбедни и неповредени“, напиша Трамп на социјалните мрежи.

Тој додаде дека Соединетите Американски Држави „мора да одговорат на овој напад“.

Изјавата на Трамп следуваше откако американски хеликоптер „Апачи“ се урна во близина на брегот на Оман, при што двајцата членови на екипажот беа спасени. Сепак, американската Централна команда (ЦЕНТКОМ) претходно соопшти дека причините за падот на леталото сè уште се истражуваат и засега не потврди дека хеликоптерот бил соборен од иранска страна.