Американските власти во текот на изминатата година добиле повеќе предупредувања од Израел дека Иран наводно планира атентат врз американскиот претседател Доналд Трамп. Едно од најсериозните предупредувања било испратено пред неговото патување во Турција на самитот на НАТО, објави „Ројтерс“, повикувајќи се на актуелен американски и двајца поранешни американски функционери.
Според изворите, израелските разузнавачки информации укажувале на можни планови за ликвидација на Трамп, вклучително и напад со снајпер или регрутирање лице кое би го нападнало со нож за време на голем јавен настан.
Предупредувањата започнале во пресрет на 12-дневната војна меѓу Израел и Иран во јуни 2025 година, а наводно станале почести пред одлуката на САД да се вклучат во воените дејствија против Иран.
Најдеталната дојава, според изворите, стигнала пред самитот на НАТО во Анкара во јули. Израелски претставници ја информирале Белата куќа дека Иран би можел да се обиде да го нападне Трамп додека патува со „Ер форс 1“, па дури и со проектил што се лансира од рамо.
Иако американските разузнавачки служби со години проценуваат дека Иран сака одмазда поради убиството на генералот Касем Сулејмани во 2020 година, ЦИА не успеала независно да потврди дел од конкретните закани што ги споделиле израелските служби.
Слична проценка имале и турските разузнавачки служби. Според турски функционер, тие не располагале со докази со кои би можеле да ги потврдат израелските информации за конкретна закана врз Трамп за време на самитот.
Сепак, Белата куќа и Тајната служба презеле дополнителни мерки за заштита на претседателот. Како дел од тајна операција за измама, Трамп по пристигнувањето во Турција бил префрлен од „Ер форс 1“ во друг авион со кој ја напуштил земјата.
Случајот ги открива и разликите меѓу американските и израелските проценки за заканата што ја претставува Иран. Додека американските разузнавачки служби претходно процениле дека Техеран активно не работи на изработка на нуклеарно оружје, Израел предупредувал дека Иран претставува непосредна опасност.
