Нови тензии избија на окупираниот Западен Брег, откако палестинските власти соопштија дека двајца млади Палестинци на возраст од 15 и 19 години биле убиени во градот Беит Умар, северно од Хеброн.
Според палестинското Министерство за здравство, во инцидентот што се случил во неделата вечерта биле повредени уште двајца млади лица.
Израелската армија соопшти дека нејзините војници реагирале откако група Палестинци фрлале молотови коктели кон израелска населба и палеле гуми. Во соопштението се наведува дека две лица биле „елиминирани“, а уште две „неутрализирани“.
По смртта на двајцата тинејџери, денеска во Беит Умар бил организиран протестен собир.
Насилството на Западниот Брег значително се интензивираше од почетокот на војната во Појасот Газа во октомври 2023 година, при што израелската армија спроведува чести операции против палестински милитантни групи.
Според палестинските здравствени власти во Рамала, во последните две и пол години во немирите на Западниот Брег загинале повеќе од 1.000 Палестинци.
Во меѓувреме, зачестени се и нападите и инцидентите меѓу израелските доселеници и палестинското население.
Израел го окупираше Западниот Брег и Источен Ерусалим за време на Шестдневната војна во 1967 година. Денес, на оваа територија живеат околу три милиони Палестинци и приближно 700.000 израелски доселеници, додека Палестинската самоуправа ја смета оваа област за дел од идната палестинска држава со Источен Ерусалим како главен град.
