Израелската армија во зголемена готовност пред годишнината од нападот на 7 октомври

Израелскиот министер за одбрана Израел Кац ѝ нареди на армијата да го зголеми нивото на готовност и да биде подготвена за „секое можно сценарио“ во Појасот Газа, во пресрет на годишнината од нападот на 7 октомври.

Од кабинетот на Кац соопштија дека наредбата е донесена поради разузнавачки информации за наводни намери на Хамас да изврши напади врз израелските сили.

— реклама —

Израелските власти стравуваат од можни заседи врз воените позиции во деловите од Газа што ги контролира израелската армија, како и од можни обиди за киднапирање војници. Израелската армија во изминатите месеци повеќепати предупредувала дека Хамас се обидува повторно да ги изгради своите оперативни капацитети.

— реклама —

Во соопштението на Министерството за одбрана е наведено дека, доколку израелските сили претрпат загуби, Хамас и населението во Газа ќе платат „висока цена“.

Зголемената готовност доаѓа во период на засилени тензии пред одбележувањето на третата годишнина од нападот на 7 октомври 2023 година, кога Хамас изврши напад врз Израел, по што следуваше голема израелска воена операција во Појасот Газа.

— реклама —

На официјалната церемонија во Ерусалим по повод годишнината, израелскиот премиер Бенјамин Нетанјаху изјави дека Хамас повеќе нема да има „никаква власт“ во Појасот Газа.

— реклама —

Според податоците на АФП, засновани на официјални извори, во нападот на 7 октомври биле убиени 1.221 лице, од кои мнозинството цивили. Хамас киднапирал и однел во Газа уште 251 лице.

Во израелската воена операција што следуваше, според податоците на Министерството за здравство во Газа, под контрола на Хамас, биле убиени повеќе од 74.200 луѓе. Обединетите нации ги сметаат овие податоци за веродостојни.