Израелските власти започнаа со изградба на 170 метри долг ров околу едно крило од затворот Кециот во пустината Негев, во кој, според планот, требало да бидат сместени нилски крокодили како дополнителна безбедносна пречка и средство за одвраќање на затворениците.
Проектот е инициран од министерот за национална безбедност, Итамар Бен Гвир, а за неговата реализација се предвидени околу 5,5 милиони евра. Во рамките на подготовките, затворските служби проучувале начини за чување крокодили, додека министерката за заштита на животната средина, Идит Силман, го променила нивниот правен статус за да овозможи нивно сместување во затворски комплекс.
Сепак, Окружниот суд во Ерусалим донесе привремена одлука со која ја запре набавката и транспортот на крокодилите, додека копањето на ровот може да продолжи.
Според израелските власти, ровот се гради околу високобезбедносен дел од затворот во кој се наоѓаат палестински безбедносни затвореници, меѓу кои и припадници на Хамас. Министерството наведува дека целта е да се спречат евентуални бегства, но критичарите тврдат дека проектот има и цел да предизвика страв кај затворениците.
Планот беше оспорен од израелската организација за заштита на животните „Let the Animals Live“, која оцени дека користењето крокодили како дел од затворското обезбедување е неприфатливо. Судот наложи дополнително да се испитаат можните последици за животните, затворениците, чуварите и животната средина.
Додека трае судската постапка, сè уште не е познато дали крокодилите навистина ќе бидат донесени во затворот, иако градежните работи на ровот продолжуваат.
