Израелски министер: Секоја вечер во Газа треба да се убиваат од 30 до 40 луѓе

Израелскиот министер за национална безбедност, Итамар Бен-Гвир, јавно повика на убивање на десетици луѓе во Газа секоја ноќ и се заложи за масовно иселување на Палестинците од Појасот Газа.

Бен-Гвир, кој е дел од крајнодесничарското крило на владината коалиција на премиерот Бенјамин Нетанјаху, во интервју објавено вчера го критикувал намалувањето на интензитетот на израелските напади врз Газа.

— реклама —

„Сметам дека во Газа треба да се спроведуваат целни ликвидации и секоја ноќ да се отстрануваат од 30 до 40 луѓе“, рекол тој во подкастот на Рома Браславски, поранешен заложник на Хамас.

— реклама —

Бен-Гвир отишол и чекор понатаму, велејќи дека меѓу целите не треба да бидат само лицата што претставуваат непосредна закана. Во истото интервју тој се заложил и за масовно иселување на Палестинците и повторно воспоставување израелски населби во Газа.

„Цела Газа ја гледам како наша“, рекол Бен-Гвир, додавајќи дека треба да се поттикне што поголем број Палестинци да ја напуштат територијата.

— реклама —

Изјавите предизвикаа дополнителни реакции, особено поради тоа што Бен-Гвир нема директна командна надлежност над израелската армија и не може да наредува воени напади врз Газа. Сепак, тој е еден од највлијателните претставници на израелската крајна десница и е надлежен за националната полиција и затворскиот систем.

Слични изјави на Бен-Гвир и други израелски функционери претходно беа остро осудувани, а дел од нив беа презентирани и во постапките пред Меѓународниот суд на правдата како аргументи за наводна намера за геноцид. Израел ги отфрла обвиненијата за геноцид во Газа.

Бен-Гвир во интервјуто повторно се заложил за населување на Газа од страна на Израел, вклучително и надвор од поранешниот блок Гуш Катиф. Израел во 2005 година ги отстрани своите населби од Појасот Газа и ги повлече своите сили од територијата.