„Ја изгубивме контролата“ – полициски час во Париз и други француски градови, Макрон одби оставка на министерот

Француските власти воведуваат полициски часови и забрани за јавни собири во делови од Париз и повеќе други градови по неколкудневните насилни немири, грабежи и судири со полицијата. Безбедносната криза доби и политички размери, откако министерот за внатрешни работи Лоран Нуњез понудил оставка, признавајќи дека полицијата во одредени градови ја изгубила контролата врз ситуацијата. Претседателот Емануел Макрон, според објавените информации, одбил да ја прифати оставката.

Во Париз, според информациите што ги пренесува АФП, јавните собири ќе бидат забранети од 20 часот во одредени делови од градот, додека од 23 часот во понеделник до 6 часот во вторник ќе важи полициски час на Плоштадот на Републиката и во трговската област Ле Ал. Станува збор за локации на кои за време на викендот биле регистрирани насилство и грабежи.

Во периодот на полицискиот час ќе биде забранет пристапот и задржувањето во опфатените зони. Властите наведуваат дека мерките имаат цел да спречат нови напади врз продавници и јавни објекти.

Ограничувања се воведуваат и во други француски градови. Во Лил и неколку градови на северот на земјата е предвиден полициски час за малолетници под 18 години, од 20 до 6 часот, во следните две ноќи. Во Ница полицискиот час за малолетници започнува во 21 часот, додека во Марсеј се забранети јавните собири и демонстрациите на територијата на целиот град од пладне до 20 часот.

— реклама —

Францускиот премиер Себастијан Лекорни побарал од локалните власти да воведуваат ограничувања само во подрачјата погодени од насилство.

„Не станува збор за воведување полициски час во целиот Париз. Тоа нема смисла“, изјавил Лекорни по состанокот на меѓуресорскиот кризен штаб.

Тој не ја исклучил можноста за прогласување вонредна состојба доколку насилството продолжи, но оценил дека во моментот поцелисходни се ограничени мерки насочени кон најризичните локации.

— реклама —

Во меѓувреме, министерот за внатрешни работи Лоран Нуњез понудил оставка, преземајќи одговорност за безбедносните пропусти за време на немирите.

„Ја понудив оставката бидејќи сум одговорен за сè што се случува“, изјавил Нуњез за „Франс интер“.

Тој признал дека полицијата не успеала да ги спречи грабежите и уништувањето на голем број деловни објекти.

„Не можете да ги погледнете трговците во очи, додека стотици продавници се ограбени, и да кажете дека во некои од тие големи градови не сме ја изгубиле контролата“, изјавил министерот.

— реклама —

Макрон ја одбил оставката, а од Елисејската палата било соопштено дека одлуката е донесена за да се зачува континуитетот во командувањето со безбедносните сили. Францускиот претседател истовремено побарал целосно расветлување на пропустите во полициското планирање и разузнавачките процени, како и итна промена на тактиката на терен.

Според податоците наведени во извештајот, за време на викендот биле уапсени најмалку 2.400 лица, а оштетени или ограбени биле најмалку 3.000 деловни објекти. На протестите во саботата, според процените на Министерството за внатрешни работи, учествувале околу 550.000 луѓе низ Франција.

Поголемиот дел од протестните собири поминале мирно, но во Париз, Лион, Марсеј и други градови избувнале судири со полицијата, пожари и грабежи. Особено голема штета претрпела историската градска куќа во Лимож, каде што, според извештајот, во пожар се урнал покривот.

Француската влада најавила финансиска помош за погодените трговци и мерки за зачувување на работните места.

Протестниот бран започнал со незадоволство на средношколците поради условите во образованието и недостигот од наставници, а потоа се проширил на прашањата за високите трошоци за живот и економската политика. На протестите им се приклучиле синдикални и граѓански организации, како и учесници поврзани со движењето „Жолти елеци“.

Опозицијата ја обвинува власта за безбедносните пропусти. Претседателот на Националното обединување, Жордан Бардела, изјавил дека владата и претседателот потфрлиле во обврската да ги заштитат граѓаните.

Нови масовни протести се најавени за сабота, 24 октомври, а француските власти најавуваат засилено полициско присуство за да спречат повторување на насилството.