„Ја наследивме државата на колена, но денес Македонија оди напред“, вели Мицкоски

Премиерот Христијан Мицкоски денеска порача дека Владата продолжува со вложувања во општините и подобрување на условите за живот, оценувајќи дека земјата денес е во подобра состојба отколку пред три години. Тој ова го истакна на промоцијата на новата комунална опрема наменета за општините.

Мицкоски се осврна на работата на Владата во изминатите 26 месеци, при што рече дека државата ја наследиле во тешка состојба, со, како што наведе, уништени институции, ограбена држава и сериозно нарушена економија.

— реклама —

„Изминативе 26 месеци се боревме со распаднати и уништени институции, со држава ограбена и клекната на колена“, рече Мицкоски, додавајќи дека Владата продолжила со започнати проекти и отпочнала нови инвестиции во патната и железничката инфраструктура.

Тој посочи дека се работи и на реконструкција на здравствени установи, а го критикуваше начинот на кој, според него, претходните влади на СДСМ и ДУИ ја воделе економијата и здравствениот сектор.

— реклама —

Како еден од позначајните проекти на актуелната Влада, Мицкоски го издвои пренесувањето средства од државниот буџет кон општините. Според него, на тој начин се обезбедени проекти во вредност од околу половина милијарда евра за капитални инвестиции на локално ниво.

Во однос на новата комунална опрема, премиерот им честиташе на општините кои ќе добијат механизација и алати за подобро справување со отпадот, но упати и повик до граѓаните за поголема одговорност кон животната средина.

„Нашата животна средина е наша животна средина и треба да си ја чуваме сите, подеднакво да бидеме одговорни кон истата“, порача Мицкоски.

— реклама —

Тој најави и следен чекор во поддршката на општините – испорака на автобуси за организирање еколошки јавен превоз, вклучително и електрични автобуси.

Мицкоски оцени дека Македонија денес е подобро место за живеење отколку пред три години и увери дека во следните три години условите дополнително ќе се подобрат.

— реклама —

„Јас ви гарантирам дека за три години ќе биде уште подобро место за живеење од денеска“, рече премиерот.

На крајот тој им се заблагодари на членовите на Владата, градоначалниците, претставниците на Светската банка, пратениците и сите кои, како што рече, придонесуваат за реализација на проектите во општините.