СДСМ преку соопштение ја поддржа иницијативата на ЛДП за ограничување на двојното државјанство кај носителите на јавни функции и порача дека во Собранието веќе има поднесено предлог-закон со слично решение.
Од партијата бараат предлог-законот повторно да биде ставен на дневен ред и да важи за сите носители на јавни функции, без исклучоци. Според СДСМ, решението треба да ги опфати пратениците од актуелниот собраниски состав, министрите и владините функционери, како и директорите на јавните претпријатија.
„Законот да важи за сите. Нека се врати законот во Собранието“, порачаа од СДСМ.
Од партијата потсетуваат дека нивниот предлог бил поднесен претходно и оценуваат дека законот не треба да остане „заглавен во фиока“. Тие инсистираат на, како што велат, јасно и доследно решение без „половични“ мерки и двојни стандарди.
СДСМ оценува дека лицата кои вршат јавни функции и примаат плата од државата треба да имаат јасно дефинирана лојалност кон државата.
Од опозициската партија упатија и политички обвинувања кон одредени функционери, меѓу кои министерот Иван Стоилковиќ, како и други лица кои, според нив, имаат врски со безбедносните структури на Србија. СДСМ тврди дека за нив не треба да има исклучоци доколку се усвои законското решение.
Од партијата повторија дека ја поддржуваат иницијативата на ЛДП и побараа предлог-законот без одложување да се врати на дневен ред во Собранието.
Според СДСМ, односот кон двојното државјанство е прашање на, како што наведуваат, „лојалност кон една држава – Македонија“.
