Словенечката полиција интензивно трага по 39-годишен државјанин на Босна и Херцеговина, кој е осомничен дека ноќеска ја убил својата сопруга во близина на Вухред, по што побегнал од местото на настанот.
Од Полициската управа во Цеље соопштија дека убиството се случило на подрачјето на Вухред, во општината Радље об Драва. Веднаш по злосторството била започната обемна потрага по осомничениот.
Полицијата ги повика граѓаните, доколку го забележат бегалецот, во никој случај да не му се приближуваат, туку веднаш да ја известат полицијата.
Според словенечките медиуми, осомничениот има постојан престој во Словенија, а се сомничи дека со нож ја усмртил својата сопруга.
Неофицијално, локалните медиуми наведуваат дека непосредно пред злосторството останал без работа. Истрагата за случајот е во тек.
