Јане Ченто: Уште колку генерации треба да се жртвуваат за Македонија конечно да стане нормална држава?

Повеќе од три и пол децении по осамостојувањето на Македонија, очекувањата за подобар живот, правда и еднаквост сè уште не се исполнети, укажува Јане Ченто во објава на социјалните мрежи и потсетува на долгогодишните разочарувања, политичките афери, неправдите и чувството дека одговорноста за моќните и влијателните останува недостижна.

Според него, најголемата загуба не се само пропуштените можности, туку животите на цели генерации кои поминале во надеж дека следните ќе имаат подобра иднина. Тој посочува дека нивните родители работеле напорно, се откажувале од сопствените потреби и се бореле за своите деца, верувајќи дека тие ќе живеат во поуредена држава. Но, како што наведува, денешните генерации се соочуваат со истите проблеми.

— реклама —

Ченто оценува дека и младите денес немаат доволно причини да останат во Македонија, особено кога, според него, знаењето и трудот не се секогаш пресудни за успехот, а семејните врски и познанствата отвораат многу врати. Тој ја поврзува загубата на населението не само со бројот на иселени, туку и со разделените семејства, родителите кои ги чекаат своите деца и празните домови.

Во објавата посебно ја нагласува потребата од институции во кои законот ќе важи еднакво за сите, без привилегии и разлики според презимето, потеклото или познанствата. Притоа посочува дека одредени кругови на влијание со децении ја задржуваат својата моќ, додека обичните граѓани работат, плаќаат даноци и се надеваат на промени.

— реклама —

„Нашите родители ја потрошија младоста чекајќи подобра Македонија, ние ги трошиме најубавите години борејќи се за неа, а нашите деца веќе заминуваат затоа што не сакаат да ја чекаат“, наведува Ченто.

— реклама —

Тој прашува уште колку генерации треба да ја платат цената на неправдите и дали и нивните деца еден ден ќе се соочуваат со истите проблеми. Според него, граѓаните не бараат посебни привилегии, туку нормална држава во која чесниот човек ќе биде почитуван, а правдата достапна за сите.

На крајот од објавата, Ченто се осврнува и на сопственото искуство, наведувајќи дека и самиот поминал повеќе години неправедно зад решетки. Токму затоа, како што посочува, не може рамнодушно да гледа на состојбите во општеството и на неправдите за кои смета дека продолжуваат да се повторуваат.

— реклама —