Јаневска до СДСМ: Инспекциите не се политичка пресметка, туку законска обврска

Министерката за образование и наука Весна Јаневска преку фејсбук објава ги отфрла обвинувањата на СДСМ дека инспекциските надзори во училиштата се користат за политички пресметки и разрешување директори кои не ѝ одговараат на власта.

Јаневска вели дека Државниот просветен инспекторат има законска обврска да врши редовни контроли во образовните установи, како и да постапува по претставки и иницијативи од граѓаните. Според неа, надзорите се распределуваат во зависност од расположливите кадровски капацитети, а таму каде што ќе бидат утврдени неправилности, се преземаат мерки согласно законите.

— реклама —

Како пример го посочи средното училиште „Панче Арсовски“, кое беше споменато и на прес-конференцијата на СДСМ. Јаневска вели дека и во овој случај инспекциските служби постапуваат согласно законските прописи.

Министерката обвинува дека СДСМ, како што вели, застанува во одбрана на незаконското работење кога инспекциските контроли ќе утврдат неправилности.

— реклама —

Јаневска истовремено ги отфрла критиките за состојбите во образованието и тврди дека во изминатите две години се вложени повеќе од 70 милиони евра во образовната инфраструктура. Според неа, набавени се нови наставни програми, учебниците се обезбедени за сите предмети, а дополнително е унапредена инклузивноста и системот за стипендирање на ученици и студенти.

Таа посочува и дека е донесена нова законска регулатива усогласена со европското право, додека платите на наставниците биле зголемени за повеќе од 20 проценти. Министерството, како што вели, работи и на воведување едносменска ефективна настава во училиштата каде што тоа е возможно.

— реклама —

Во однос на училиштата во руралните средини кои привремено се затвораат поради недостиг на запишани ученици, Јаневска одговорноста ја лоцира во политиките на претходната власт. Таа тврди дека во седумгодишното владеење на СДСМ бројот на ученици бил намален за 17.000.

Министерката најави дека Министерството ќе продолжи со реформите и вложувањата во образованието, без оглед на, како што ги нарече, политичките обвинувања и обидите за опструкција.