Јаневска: во политиките на МОН приоритетни се интересите на децата

Министерката за образование и наука Весна Јаневска изјави дека интересите на учениците се приоритет во политиките на Министерството за образование и наука и дека оптимизацијата на училишната мрежа е неопходна поради намалениот број ученици во земјата.

Одговарајќи на пратеничко прашање во Собранието, Јаневска рече дека во седумгодишното владеење на СДСМ и ДУИ бројот на ученици е намален за околу 17.000, поради што има подрачни училишта во кои наставата ја следат само две или три деца.

— реклама —

Според неа, во такви услови учениците немаат можност за социјализација, натпреварување со своите врсници и користење современа образовна технологија, па затоа е подобро да посетуваат настава во најблиските поголеми училишта.

Министерката нагласи дека оптимизацијата нема да значи отпуштање на наставници.

— реклама —

„Во изминатите две години од мандатот на Владата ниту еден наставник не е отпуштен од работа, ниту ќе биде во периодот што следи“, истакна Јаневска.

— реклама —

Таа додаде дека на наставниците ќе им биде овозможено да го дополнат фондот на часови преку работа со талентирани ученици, ученици кои имаат потреба од дополнителна поддршка, како и преку воннаставни активности и училишни секции.

Јаневска посочи и дека учениците во Македонија минуваат помалку време на училиште во споредба со европскиот просек. Според неа, до 14-годишна возраст учениците имаат вкупно 6.816 наставни часа, додека просекот во земјите членки на ОЕЦД изнесува 7.775 часа.

Во однос на изградбата на основното училиште во тетовското село Селце, министерката рече дека објектот бил изграден во времето на претходната Влада, но без фасада, партерно уредување и потпорен ѕид на дел од теренот каде што постои опасност од свлечиште.

Таа истакна дека актуелната Влада ќе го заврши проектот за да не пропаднат веќе вложените средства, наведувајќи дека нема да се дозволи повторување на случаите со објектите на ФИНКИ и ФФК, кои со години останале недовршени.