Парламентот на Словенија денеска го избра лидерот на Словенечката демократска партија, Јанез Јанша, за нов премиер со 51 глас „за“ и 36 „против“.
Со ова, Јанша доби мандат за составување на својата четврта влада, која ќе биде 16. влада на Словенија. Во рок од 15 дена треба да ги предложи министрите во новиот кабинет.
По изборот, Јанша положи свечена заклетва пред пратениците дека ќе го почитува уставниот поредок и ќе работи во интерес на државата.
Лидерот на СДС претходно потпиша коалициски договор со партиите Нова Словенија, Словенечка народна партија, „Фокус“ и „Демократи“.
Меѓу главните приоритети на новата влада, Јанша ги најави економскиот развој, борбата против корупцијата и организираниот криминал, како и децентрализацијата и дебирократизацијата.
Новата влада треба да ја наследи администрацијата на Роберт Голоб, кој и покрај победата на изборите во март, не успеа повторно да формира коалиција.
