Јаник Синер со 32 победи во низа на Мастерс 1.000 го урна рекордот на Ѓоковиќ

Јаник Синер го совлада Андреј Рубљов во четвртфиналето на Мастерсот во Рим и ја запиша својата 32. победа во низа на турнирите од серијата Мастерс 1.000.

Италијанецот славеше со 2-0 во сетови, по еден час и 32 минути игра – 6:2, 6:4.

— реклама —

Со оваа победа Синер го урна рекордот на Новак Ѓоковиќ по број на последователни победи на Мастерс турнирите. Србинот во 2011 година имаше низа од 31 победа, додека Синер сега стигна до најмалку 32.

— реклама —

Рубљов беше единствениот што можеше да го спречи паѓањето на рекордот, но не успеа да му се спротивстави на расположениот Италијанец, кој сега води со 8-3 во меѓусебните дуели, со шест победи во последните седум натпревари.

Синер уште во првиот гем направи брејк и ја наметна својата игра. Рубљов имаше можност да возврати неколку гема подоцна, но Италијанецот успешно ги спаси брејк-топките и потоа со уште еден брејк го освои првиот сет.

— реклама —

Во вториот сет сценариото беше речиси идентично. Синер повторно рано направи брејк и не му дозволи на противникот сериозно да се врати во мечот.

Рубљов успеа да врати еден брејк и да намали на 3:4, но првиот светски рекет остана смирен во клучните моменти и сигурно го приведе натпреварот до крај.

Во полуфиналето на турнирот во Рим Синер ќе игра против победникот од дуелот меѓу Данил Медведев и Мартин Ландалусе.