Генералниот секретар на Владата, Игор Јанушев, се огласи по приведувањето на неговиот поранешен возач во случај поврзан со барање мито, при што целосно се огради од неговото постапување.
Јанушев преку објава на „Фејсбук“ порача дека го поздравува и поддржува постапувањето на надлежните институции за спречување на корупцијата, како и граѓанинот кој го пријавил барањето за мито и соработувал со институциите.
„За вакви постапки мора да има нулта толеранција, без разлика кој е сторителот“, напиша Јанушев.
Во однос на приведеното лице, тој нагласи дека неговото постапување нема никаква врска со него, неговата функција или неговото работење. Според Јанушев, лицето било возач кој во минатото работел и кај други функционери, а како возач кај генералниот секретар било ангажирано околу шест месеци.
„Неговото незаконско постапување е исклучиво негова лична одговорност и за стореното треба да одговара пред надлежните институции“, наведе Јанушев.
Тој во објавата го обвини СДС дека се обидува од конкретниот случај да создаде политичка конструкција и да поврзе лица и настани кои, според него, немаат допирна точка со реалноста.
„Не можам да дозволам нечии незаконски постапки да го валкаат угледот на луѓето кои чесно, одговорно и деноноќно работат за резултати“, порача Јанушев.
Генералниот секретар на Владата додаде дека корупцијата треба да се пријавува, институциите треба да постапуваат, а секој што ќе го прекрши законот треба да одговара, без оглед на функцијата, партијата или близината со кој било функционер.
