Димитар Цингаровски, вработен во Службата за општи и заеднички работи на Владата (СОЗР), а ангажиран како возач на генералниот секретар на Владата Игор Јанушев, е осомничен дека побарал 1.500 евра од граѓанин за да посредува за негово вработување во Противпожарната бригада на Град Скопје. Тој бил фатен при примопредавање на дел од парите и завршил во 30-дневен притвор.
Според информациите на Обвинителството, Цингаровски се повикувал на својата позиција како возач на висок владин функционер и ветувал дека ќе го искористи своето претпоставено влијание за да посредува кај службени лица во Град Скопје во постапката за вработување пожарникари.
Случајот бил откриен откако граѓанинот од кого биле побарани парите го пријавил случајот.
„Постапката е иницирана по пријава на граѓанин од кого осомничениот, во периодот од 24 јули до 4 септември 2026 година, побарал 1.500 евра за да го искористи своето претпоставено влијание. Осомничениот, кој работел како возач на висок владин функционер, му ветил на оштетениот дека ќе посредува кај службени лица во Град Скопје во врска со вработување по распишан оглас за прием на пожарникари“, соопшти Обвинителството.
По пријавата, надлежните органи, во координација со обвинител, презеле мерки за документирање на случајот.
На 4 септември Цингаровски бил затекнат при примопредавање на 500 евра, како дел од вкупно побараните 1.500 евра. Парите претходно биле обележани.
Обвинителот побарал притвор поради опасност од бегство, можност осомничениот да влијае врз сведоците и опасност да го повтори кривичното дело.
„Судијата на претходна постапка го прифати предлогот на обвинителството и со решение на осомничениот му определи притвор во траење од 30 дена“, велат од Обвинителството.
Оттаму го потенцираат и значењето на граѓанинот кој го пријавил случајот, оценувајќи дека соработката со институциите овозможила навремена реакција и обезбедување докази.
„Навременото пријавување на корупцијата и подготвеноста на граѓаните да соработуваат со надлежните институции е исклучително важно. Пријавувањето на барање или понуда за поткуп и противзаконито влијание овозможува навремена реакција, обезбедување докази и ефикасно постапување на надлежните органи“, порачаа од Обвинителството.
Случајот е во фаза на истага. За тоа време возачот останува во притвор. Следната фаза е обвинителот да покрене обвинение со оглед дека лицето е фатено со парите. Потоа следи процес на судење каде би се утврдувала вина.
Јавното обвинителство ги повика граѓаните да ги пријавуваат случаите на корупција и противзаконито влијание и најави постапување по сите сознанија за кои постојат основи за обвинителски дејствија.
