Пратеникот Љупчо Николовски реагираше на тврдењата на Манасиевски и порача дека тој е лицето што поднело тужба, а не обратно.
Николовски посочи дека на одржаното подготвително рочиште бил присутен неговиот полномошник, додека тој лично ќе присуствува на распитот.
„Јас го тужам Манасиевски, не тој мене. Ова беше подготвително рочиште и таму беше мојот полномошник. Кога ќе дојде распитот ќе бидам и лично“, наведе Николовски.
Тој додаде дека и во претходни случаи, како што тврди, бил предмет на „измислици“, за кои добил правосилни пресуди.
Според Николовски, тужбата против Манасиевски се однесува на негови тврдења поврзани со житото и ИПАРД. Тој посочи дека Агенцијата за стокови резерви не била во надлежност на Министерството за земјоделство, додека Министерството не доделувало ИПАРД грантови.
„Кога немаш аргументи за една лага, замајуваш со три нови. Стан од 180м2, дуплекси, службени возила, мешаш браќа и сестри. Класичен застарен модел по кој ова ДПМНЕ функционира со години“, изјави Николовски.
Тој порача дека правдата ќе ја бара преку судската постапка.
„Правдата си ја барам на суд. Од вистината Манасиевски не може да побегне“, порача Николовски.
