Александар Николоски денеска соопшти дека рокот за изградба на автопатските делници Тетово–Гостивар и Гостивар–Букојчани ќе биде продолжен за две години, односно до декември 2029 година.
Изјавата ја даде при увид на градежните активности, заедно со премиерот Христијан Мицкоски и директорот на Јавното претпријатие за државни патишта, Коце Трајановски.
Според Николоски, причината за пролонгирањето е двегодишниот застој на проектот за време на претходната влада.
„Надзорниот инженер на проектот во ноември побара да се надополни тој период од рокот за изградба и немавме друг избор освен да прифатиме“, изјави Николоски.
Тој нагласи дека не очекува зголемување на цената на проектот што го реализира конзорциумот „Бехтел и Енка“.
„Експропријацијата е завршена и не очекувам да има анекс за зголемување на цената“, рече министерот.
Николоски посочи дека еден од главните предизвици е дислокацијата на бројни инфраструктурни водови долж трасата, меѓу кои главни оптички врски, далноводи, водоводни и канализациони линии, како и главниот канал за наводнување на Полог.
„Мора да се биде внимателен за да не се нарушат овие системи“, рече тој.
За делницата Гостивар–Букојчани, министерот оцени дека теренот е „почист“, но изградбата ќе биде посложена поради планинскиот предел околу Буковиќ.
Дополнителен предизвик, според него, е поврзувањето на бројните населени места и општини меѓу Тетово и Гостивар преку надвозници и приклучоци.
Николоски најави и дека во меѓувреме ќе продолжи одржувањето на постојниот пат Тетово–Гостивар, со цел непречен сообраќај кон Маврово.
