„Јасно е каде оди светот, ќе продолжиме да ја водиме државата кон просперитет, опозицијата со своето мочуриште се однесува неодговорно кон граѓаните“: Мицкоски за дата-центрите

Премиерот Христијан Мицкоски денеска порача дека развојот на центрите за податоци е неизбежен процес и дека Владата ќе продолжи да ја насочува државата кон технолошки и економски развој, и покрај противењето од опозицијата.

— реклама —

Одговарајќи на новинарско прашање при посетата на Општина Бутел, Мицкоски оцени дека опозицијата со ставовите против изградбата на центри за податоци се однесува неодговорно кон економијата и граѓаните.

„Јасно е каде оди светот и овој процес е неповратен. Ние знаеме каде да ја водиме Македонија и ќе ја водиме кон просперитет и иднина“, рече Мицкоски.

— реклама —

Тој посочи дека центрите за податоци се дел од глобалниот технолошки развој, нагласувајќи дека во нив инвестираат САД, европските и азиските земји. Во тој контекст го спомена и неодамнешното обраќање на американскиот претседател Доналд Трамп, кој ги повика заедниците да ја поддржат оваа индустрија поради потенцијалот за економски раст, работни места и пониски даноци.

— реклама —

Мицкоски оцени дека Македонија не смее да остане надвор од технолошките процеси што се одвиваат во светот.

„Кога ќе видите како функционираат технолошки развиените земји, се враќате со воодушевување. А кога Владата ќе каже да направиме нешто и кај нас, тогаш сте против“, рече премиерот.

Тој повторно ја критикуваше опозицијата, додавајќи дека Владата ќе продолжи со политиките што, како што рече, треба да обезбедат просперитет и подобра иднина за државата.