Јогуртот, здравата исхрана и прошетките можат да го забават стареењето

Комбинацијата од секојдневно консумирање јогурт, здрава исхрана и умерена физичка активност може да го забави биолошкото стареење, покажува ново истражување објавено во научното списание Aging.

— реклама —

Во студијата учествувале 48 мажи на возраст од 50 до 74 години со прекумерна телесна тежина. Во период од 12 недели, половина од учесниците следеле посебна програма што вклучувала секојдневно консумирање 100 грама обичен јогурт, индивидуално прилагодена исхрана и најмалку 30 минути пешачење или лесно вежбање трипати неделно, додека контролната група ги задржала своите вообичаени навики.

— реклама —

Научниците ја проценувале брзината на биолошкото стареење преку анализа на ДНК-маркери во примероци од крв. Резултатите покажале дека кај учесниците кои ја следеле програмата, биолошкото стареење се забавило во просек за околу 2,2 проценти во споредба со контролната група.

— реклама —

Истражувачите нагласуваат дека забавувањето на стареењето не било директно поврзано со губење на телесната тежина, туку најверојатно е резултат на комбинираниот ефект од пробиотскиот јогурт, подобрената исхрана и физичката активност.

— реклама —

Сепак, авторите предупредуваат дека станува збор за мала студија со кратко времетраење и дека се потребни дополнителни истражувања за да се утврди дали овие краткорочни промени носат и долгорочни здравствени придобивки.