Како изборите во САД можат да ја променат американската поддршка за Украина?

Можната победа на демократите на изборите за Конгресот во САД би можела да ја зајакне поддршката за Украина и да отвори простор за поголема контрола врз надворешнополитичките одлуки на Доналд Трамп. Сепак, аналитичарите оценуваат дека американскиот претседател и натаму ќе има големо влијание врз односите со Киев и Москва, пишува „Киев индепендент“.

Во пресрет на изборите на 3 ноември, односите меѓу Вашингтон и Киев се на ниско ниво. Трамп ја ублажи политиката на санкции кон Русија, дозволи увоз на руски дизел и побара од Украина да ги прекине нападите врз руските рафинерии. Во исто време, Киев се соочи со прекини во разузнавачката поддршка и испораките на системите „Патриот“.

— реклама —

Американските гласачи избираат 435 членови на Претставничкиот дом, а анкетите предвидуваат дека демократите би можеле да го освојат мнозинството. Во Сенатот, каде што се избира една третина од членовите, патот до мнозинство за демократите е потежок.

Дури и ако ја преземат контролата врз двата дома, демократите ќе мора да обезбедат поддршка од дел од републиканците за усвојување важни закони. За надминување на правилото „филибастер“ во Сенатот се потребни 60 гласа, а претседателот може да стави вето на законите. За поништување на ветото е потребно двотретинско мнозинство во двата дома.

— реклама —

Сепак, демократите би можеле да ја вклучат помошта за Украина во законите за одбранбениот буџет и националната одбрана, кои се од суштинско значење за функционирањето на Министерството за одбрана. Но, останува прашањето дали администрацијата на Трамп навистина ќе ги спроведува таквите одредби.

Претходните случувања покажуваат дека усвојувањето закон не гарантира и негова целосна примена. Иако во септември бил усвоен закон за санкции против Русија, Трамп во октомври одобрил широко изземање од неговата примена. Слично, Пентагон со месеци ја одложувал исплатата на 400 милиони долари воена помош за Украина, иако средствата биле одобрени од Конгресот.

— реклама —

Евентуалната победа на демократите би им овозможила и поголеми надзорни овластувања. Тие би можеле да организираат истраги и да повикуваат владини претставници на сведочење, вклучително и за одлуките поврзани со Украина. Меѓу темите што би можеле да бидат предмет на проверка се работењето на „Старлинк“, испораките на ракетите „Патриот“ и мировните иницијативи на американските претставници Стив Виткоф и Џаред Кушнер.

Демократите би можеле да покренат и постапка за отповикување на Трамп, но за негово отстранување од функцијата е потребно двотретинско мнозинство во Сенатот.

— реклама —

Сепак, Украина веројатно нема да биде меѓу главните приоритети на демократите веднаш по изборите. Нивната програма за првите 100 дена е насочена кон прашања што најмногу ги засегаат американските гласачи, пред сè трошоците за живот и последиците од судирот со Иран.

Аналитичарите предупредуваат дека, дури и со Конгрес под контрола на демократите, Трамп ќе ја задржи главната улога во американската надворешна политика. Според нив, претседателот би можел уште поактивно да ги води своите меѓународни иницијативи, вклучително и односите со Русија и Кина, што би можело дополнително да влијае врз Украина и Европа.